Print logo

Ажлын айлчлал
Зүүн хойд болон Төв Азийн хэлтсийн дарга Вилли Ланге Монголд айлчиллаа

Ханнс-Зайделийн сангийн төлөөлөгчийн газар Монгол Улсад 1995 онд байгуулагдсан цагаас ноён Ланге тасралтгүй хариуцан ажиллаж герман-монголын эрх зүйн салбар дахь хамтын ажиллагаанд томоохон хувь нэмэр оруулжээ.

Монголын үндсэн хууль, захиргааны эрх зүйн салбарын хуульч, эрдэмтэд, зарим түншлэгч байгууллагын төлөөлөгч нарын хамт

Айлчлалын үеэр Вилли Ланге-г Үндсэн хуулийн цэцийн дарга Д.Одбаяр, Хууль зүй, дотоод хэргийн сайд Ц.Нямдорж, Дээд шүүхийн ерөнхий шүүгч Х.Батсүрэн зэрэг түншлэгч байгууллагуудын удирдлагууд хүлээн авч уулзлаа. Ажлын нэг өдөр (27.05.2019) үргэлжилсэн түүний сүүлийн богино хугацааны албан айлчлал хүндэтгэл хийгээд шагналаар дүүрэн байлаа.

УДШ-ийн Ерөнхий шүүгч Х.Батсүрэнгээс тус шүүхийн Хүндэт тэмдэг гардан авлаа

“Улсын Дээд шүүхийн Хүндэт тэмдэг” гардан авлаа

Улсын Дээд шүүхийн Ерөнхий шүүгчийн захирамжаар н. Вилли Ланге-г 2019 оны 05 дугаар сарын 27-ны өдөр “Улсын Дээд шүүхийн Хүндэт тэмдэг”-ээр шагналаа. Шагналыг Улсын Дээд шүүхийн ерөнхий шүүгч Х.Батсүрэн гардуулан өгч, Монгол Улсад тус сангийн эрх зүйн салбар дахь төсөл амжилттай хэрэгжсэнийг тэмдэглээд үүнд ноён Вилли Лангегийн ажил мэргэжлийн туршлага, хувь нэмэр их байсныг онцоллоо.

Шагнал гардуулах ажиллагаанд УДШ-ийн Иргэний хэргийн танхимын тэргүүн Х.Сонинбаяр, Захиргааны хэргийн танхимын тэргүүн М.Батсуурь, Тамгын газрын дарга Ж.Наранпүрэв, Ханнс-Зайделийн сангийн Монгол дахь төлөөлөгчийн газрын тэргүүн проф. др. Ц.Сарантуяа, тус сангийн “Эрх зүйн боловсрол” академийн захирал А.Энхтуяа болон бусад хүмүүс байлцав.

ХЗДХ-ийн сайд Ц.Нямдорж н. Ланге-г тус салбарын Тэргүүний ажилтан тэмдгээр шагналаа

“Хууль зүйн албаны тэргүүний ажилтан” тэмдэг хүртэв

Монгол Улсын эрх зүйн салбарыг хөгжүүлэх, хууль тогтоомжийг боловсронгуй болгох, тэдгээрийн хэрэгжилтийг хангах чиглэлд тасралтгүй 15-аас доошгүй жил үр бүтээлтэй ажиллаж амжилтад хүрсэн, амжилт бүтээл нь хамт олон, мэргэжлийн хүмүүст үнэлэгдсэн, мэргэжлийн туршлага, өндөр ур чадвартай хуульч, төрийн албан хаагчийг “Хууль зүйн албаны тэргүүний ажилтан” тэмдгээр шагнадаг журамтай. 

ХБНГУ-ын Ханнс-Зайделийн сангийн Зүүн хойд болон Төв Азийн газрын дарга Вилли Ланге-гийн тус улсын хууль зүйн салбарт оруулсан хувь нэмрийг үнэлж Хууль зүй, дотоод хэргийн сайд Ц.Нямдорж “Хууль зүйн албаны тэргүүний ажилтан” тэмдгээр шагналаа.

зүүнээс: МУИС-ийн ХЗС-ийн захирал профессор, доктор Ж.Эрдэнэбулган, Аакадемич С.Нарангэрэл, шинэхэн Хүндэт доктор Вилли Ланге

МУИС-ийн Хууль зүйн сургуулийн "Хүндэт доктор" цол хүртэв

МУИС-ийн Хууль зүйн сургуулийн Эрдмийн зөвлөлийн шийдвэрээр Вилли Лангед МУИС-ийн Хууль зүйн сургуулийн "Хүндэт доктор" цол олголоо. 

Хүндэт доктор цол олгох ёслолын арга хэмжээ 2019.05.27-ны өдөр МУИС-ийн ХЗС-ийн Г.Совдын нэрэмжит Эрдмийн танхимд болов. Ёслолын ажиллагааг нээж МУИС-ийн ХЗС-ийн Эрдмийн зөвлөлийн дарга, проф. др. Ж.Эрдэнэбулган үг хэлсэн бөгөөд Эрдмийн зөвлөлийн тогтоолыг уншиж танилцуулав. Хүндэт доктор цол олгох ёслол үйлдсэний дараа, Монгол улсын шинжлэх ухааны гавьяат зүтгэлтэн, академич С.Нарангэрэл үг хэлэв.

Ханнс-Зайделийн сан болон Монгол Улсын Их Сургуулийн Хууль зүйн сургуулийн хамтын ажиллагааг олон жил үр бүтээлтэй хэрэгжүүлж, Монгол Улсад хууль зүйн шинжлэх ухааны салбарыг хөгжүүлэх, мэргэшсэн хуульчдыг бэлтгэхэд үнэтэй  хувь нэмэр оруулсан Вилли Ланге-д  МУИС-ийн ХЗС-ийн хамт олон болон үе үеийн хамтран зүтгэгчид, нийт монголчуудын нэрийн өмнөөс  халуун баяр хүргэж, эрүүл энх, аз жаргал, урт удаан наслахыг хүсэн ерөөв.

Ханнс-Зайделийн сангийн тэтгэлгээр германд урт, богино хугацааны сургалт, судалгаанд хамрагдсан тэтгэлэг авагчдын төлөөлөл тус үйл ажиллагаанд оролцон дурсгалын зүйл гардууллаа. Чин сэтгэлийн талархал хийгээд дахин уулзахын ерөөлөөр монголчууд түүнийг үдлээ.